Hondelewe

Dit is so lank terug, sedert ek van my laat hoor het, ek wonder of enige iemand ooit nog onthou dat ek bestaan! Wel, hier is ek, nog steeds lewendig, ook maar net-net! Ek lei nou ‘n pure hondelewe, soos ons in Afrikaans sê! Niemand gee meer vir my om in hierdie huis nie! Niemand wil meer met my speel nie!! Niemand doen iets nie! Almal ignoreer my net links, regs en centre! Wat gaan aan met hierdie familie! Allerlei dinge gebeur en al wat ek hoor is SEERPOOT! en WAAR is jou seerpoot? En nee, jy kan nie dit doen nie, jou poot moet rus en nee, ons kan nie soontoe gaan nie, jou seerpoot moet rus!! Wat is hierdie ‘seerpoot‘ nou eintlik? My ‘seerpoot’ word so baie aangevat, dat ek al WEET waarheen om te kyk as daar ‘seerpoot‘ gesê word! Ja, dis my linker-knie en ek weet dit baie goed, want vir die afgelope 3 weke is dit al wat ek hoor en al waaraan gevat word, as jy dit ‘vat’ kan noem! Al wat ek nou wil doen is net om te gaan lê en wag vir die ‘einde‘! Hoe lank gaan ek nog ‘SEERPOOT‘ moet hoor? En hoe lank gaan daar nog aan ‘SEERPOOT‘ gevat word in hierdie huis? Kan iemand hierdie familie net vra om my ook in te lig, sodat ek weet om nie meer so ‘down’ te voel nie!? Ek is nou siek en sat vir ‘rus‘ en NIKS doen nie! Hoekom is daar op hierdie aarde so iets soos Veeartse wat vir mense stories opmaak oor SEERPOTE!

Al die veld is vrolik

Ons het twee dae terug weer Ounooi ‘n ander stappaadjie gaan wys. Hier is so baie stappaadjies en as jy eers begin stap, voel dit vir jou asof jy iewers op ‘n plaas rondloop. Poplap was natuurlik opgewonde, want ‘n gedeelte van hierdie paadjie het sy saam met maats so drie jaar terug gestap toe hulle op hul eie gelaat was. Sy was besig met die Duke of Edinburgh-award en deel daarvan was om ‘n kamp te doen. Julle kan oor die DoE-award meer hier lees. Dis ‘n drie-jaar program en die toekennings begin van brons na goud.

Om ‘n hond te wees in hierdie bos is groot werk, want die familie stap nie heeltyd saam nie, Poplap is heeltemal te fiks vir die res en ek moet net heeltyd tussen die twee groepe hardloop om seker te maak almal agter is nog wel! Op hierdie foto kan jul vir Poplap ver vorentoe so half en half sien.

Sjoe, dis darem mooi hoor!

Hierdie is pragtige perde. Hulle is so mak, hulle kom eintlik nader na jou toe sodra hulle jou sien aankom. Hulle moet baie van mense hou, want hulle laat jou toe om byna tot teenaan hulle te kom.

Pienk blomme. Ounooi sê sy is baie sleg met blomname, in Suid-Afrika al was sy so, dus met die Engelse s’n sal sy pateties wees! Sy sê haar ma het ‘n blom/plant net een kyk gekyk en dadelik geweet wat die naam was en sy het al so baie keer gewens sy was ook so met plant/blomname!

‘n Lekker tonneltjie – wat die bos vorm.

Hier loer ons deur na lande wat lyk asof daar koring geplant is, maar dit is nie koring nie.

Iemand het 30 jaar oud geword en sy/haar ballon hier vergeet! Ai, die morsjorse!

Sjoe, kyk net hoe hang my tong uit. Darem word daar vir my gestop sodat ek ‘n tweede asem kan skep en net my tong weer korter kan maak.

Poplap is stout! Hier sit sy in die boom op ‘n tak en ek kan nie opklim nie!

Hierdie mense is kwaai. Hulle sê jy mag net hier afstap wanneer die hekke oop is…sjoe. Gelukkig is die hekke oop en kan ons afloop.

‘n Lekker loer-plekkie.

En nog ‘n loer-plekkie. Ek wonder of julle die stofwolkie kan sien wat daar trek? Hierdie land is so vol klippe! Die arme boer sukkel seker sy dinges af om van die klippe ontslae te raak.

Hier is die boer! Die trekker was eintlik seker so ‘n halwe myl van ons af! Gelukkig met die kamera kan mens als nader bring…en lyk dit asof ons by hom was. Ounooi was so vinnig om die foto te neem.

Ai, Ounooi het gedink die foto is nogal kleurvol.

Die een ook! Gelukkig het ek ver weg gebly van die steek-goete af. Poplap is morsdoodbang vir die goeters en Boeta hardloop dat jy net sien stof trek as hy die woord by hoor! Hulle altwee is soos magnete as dit by bye kom en ek weet al om die goeters sommer stukkend te byt as hulle naby hulle kom.

Nog mooi pers blomme met hul saad wat soos wolle lyk.

Mooi pienk blommetjie, né?

‘n Ou gebou. Dit lyk nie asof dit vir iets gebruik word nie.

Ounooi het nog gedink hierdie lyk soos ‘n private mini-golfbaan, toe help Boeta haar reg en sê dis waar die plaaslike miniatuur-vliegtuigliefhebbers bymekaar kom. Dit is sommer so klein stukkie landingstrokie, dat dit lyk asof daar net-net vyf persone daarop gaan pas met hul speelgoedjies.

‘n Soenhekkie – kissing gate.

Hier kom die Skim!

Ligene – mooi geel

Hierdie lyk na ‘n mooi patroontjie van ligene.

Hierdie sak werk amper soos ‘n Skip. Ek wonder of julle daarop kan lees. Dis ‘n Hippo-Bag.  Al die takkies langsaan moet seker daarin gaan.

AL DIE VELD IS VROLIK

Woorde: C. LOUIS LEIPOLDT
Musiek: J. WEBER; verwerk: PIETER DE VILLIERS

Al die veld is vrolik; al die voëltjies sing;
al die kriekies kriek daarbuit’; elke sprinkaan spring.
Al die koggelmannetjies kom om fees te vier;
hier galop ‘n goggatjie, daarso dans ‘n mier.

[KOOR]
Nou gaan die kinders draai, nou gaan hul speel!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!

Selfs die vissies spartel teen die kafferskuil;
in die groot ou eikeboom droom ‘n oupa-uil.
Oral in Karooland is ‘n ruik versprei:
boegoeblom en appelkoos–kan jy beter kry?

[KOOR]
Nou gaan die kinders draai, nou gaan hul speel!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!

Bind vir my tesame katjiepiering wit,
bobbejaantjies blou en bont, rose in gelid,
varings van die klippe, oral, ai só mooi,
rooi kalkoentjies uit die vlei–blomme uitgestrooi.

[KOOR]
Nou gaan die kinders draai, nou gaan hul speel!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!

Vrolik is die wêreld, vrolik rant en vlei!
Elke koggelmannetjie het sy maat gekry.
Elke gons’rig’ goggatjie is getroud of vry:
vrolik is die wêreld hier, vrolik veld en vlei!

[KOOR]
Nou gaan die kinders draai, nou gaan hul speel!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!
Kom Sus, gee handjie! Almal moet draai!
Boet gee ook handjie! Nou gaan ons swaai–
dis tog so prettig! Wie dans met my?
Al in die rondte, vrolik en bly!

As jy weet hoe om “background sound” op ‘n site te gebruik, hier is ‘n gedeelte van die link wat jy gebruik en die res is die website-link hierna. Dan kan jy die musiek wat jy op die link hoor, gebruik. Geniet dit.

<bgsound src=”../midi/052.mid” loop=”-1″>

http://www.busyhands.co.za/lyrics/la_aldieveld.htm

Water! Water! Water!

Sjoe, ons het ‘n paar baie warm dae gehad en ek kon die hitte net nie meer weerstaan nie. Soos julle hier sien, geniet ek myself gate uit met die sproeier wat Oubaas vir my opgekoppel het. Natuurlik kon ek dit nie vir te lank doen nie, want anders sou ek sopnat gewees het, maar ai, dit was groot lekkerte!

Bahonne Bahonne!

Aitsa! Ek is gekies vir die Bahonne Bahonne team! Hier is my nuwe bal – nogal Action Ball – nou gaan julle my in aksie sien! [Oubaas sê dis die Bampša Bampša-team, want  mpša is Sotho vir honne, maar ek hou meer van ‘honne’]

Posisie 1 – linker poot voor…

Posisie 2 – laag afbuk!

Posisie 3 – en rol!

Posisie 4 – en lê!

Posisie 5 – en hardloop vorentoe, jou lyf baie reguit!

Posisie 6 – regterpoot op – hou vir wat jy kan!

Posisie 7- en RUS! – nou ken jy ook die Diski-dans! Probeer gerus! Resultate die moeite werd!

Baie Afrikaans!

Die trekkery het my sommer baie op-en-af laat hardloop. Ek het nie mooi geweet wat aan die gang was nie. Ounooi het baie met my mooi gepraat en elke nou en dan het Poplap of Boeta met my buite gaan sit en moes ek die geel ronde skapie gaan optel. Ek weet nie van “bring” nie. Ek het nou al baie woorde geleer. Dit is seker hoekom Ounooi sê dat ek ‘n slim honne is. Ek het nou al geleer om te sit. Ek weet goed wat Poplap wil hê ek moet doen as sy “sit” sê. Ek weet ook al wat “doedoe” is. Kyk net hoe heerlik doedoe ek hier op Ounooi se skoot! Poplap is besig om my te leer van “bly”. Ek leer baie Afrikaans!

Ounooi het my eerste van “doedoe” geleer. Ek het haar ook hoor sê dat haar ander honne ook doedoe geken het. Hulle was ook seker slim honne, nes ek. Slim honne is seker lekker. Ek wonder wie nog ‘n slim honne is. Ek wil nou net die donker oor my oë laat kom, want ek weet nog nie van trek nie, maar ek weet dat trek honne moeg maak.

Ounooi kon my nie baie lank laat doedoe op haar skoot nie. Ek wonder nog steeds of trek lekker is. Ek het net geweet dat hierdie matjie baie lekker warm vir my kop is, die lekkerte begin sommer by my tong en dan gaan lê dit agter my ore. Ounooi en Poplap het my nat gemaak. Ek het hulle hoor iets sê van bad, maar ek weet nog nie mooi van bad nie. Ounooi leer my nog van bal en dit klink vir my amper soos bad. Ek vat die geel ronde skapie en sit dit dan graag agter hierdie hout kassie neer. Gister het ek ook die eerste keer geleer van marmotte. Ek weet nog nie mooi van dit nie, maar ek weet Poplap en Boeta sal my mooi leer van marmotte. Boeta-hulle kyk na die marmotte en dan wil ek ook kyk. Die marmotte lyk vir my soos skapies. Ek dink Ounooi is ook ‘n slim honne. Sy weet dat ek skapies wil hê. Boeta-hulle verstaan nie mooi hoekom ek nie die ronde geel skapie vir hulle wil gee nie. Ek kom net hier sit en hulle moet dan vir my weer vertel wat om te doen. Boeta weet nie mooi van slim honne nie. Poplap ook nie. Slim honne bring nie ronde geel skapies nie. Slim honne wag mooi soos ‘n slim honne. Die marmotte hou van my, hulle weet dat ek hulle moet bring. Hulle hardloop nie vir my weg nie.

Ek sit die ronde geel skapie net neer en wag. Boeta en Poplap moet dan vir my sê waarheen ek die geel ronde skapie moet vat, maar hulle tel dit net weer op en gooi dit weg! Ek moet dan die geel ronde skapie gaan optel! Ek weet nog nie van haal en bring nie.

Ai tog, ek is pootuit. Ek is in my nuwe huis en Ounooi-hulle het vir my die groot warm kamer gegee. Ounooi het iets gesê van “conservatory”. Boeta het gesê dat dit vir my lekker warm gaan wees. Ek weet baie van die woord lekker. Ek het gaan lê en dan kom die donkerte oor my oë. Trek is baie harde werk. Dit het ek ook nou gesien. Ek moes in die masjien lê wat so harde geraas maak. Die geraas het my maag so bietjie snaaks laat voel. Poplap het my by haar voete laat lê en ek het nie omgegee nie. Poplap het vir my lekker kossies gegee. Ounooi het my mooi geleer van doedoe, sy het net doedoe gesê toe voel ek hoe die donker oor my oë kom. Boeta het  ook ‘n slim honne geword. Hy het vir my sy lekker raaskas met sagte geluide kom neersit en ek het lekker gevoel. Die sagte geluide het die donker oor my oë baie vinniger laat kom.